அரசியல் – கவிதைகள்
பந்தயக் குதிரை:
நீங்கள்
பந்தயக் குதிரைகள்
என்பதை
மறந்து விடாதீர்கள் !
வேகமாக
ஓடுகின்றவரைதான் !
சறுக்கி விழுந்தீர்களானால் …?
வியாபாரம் செய்பவன்
வியாபாரி
விபச்சாரம் செய்பவள்
விபச்சாரி
இரண்டையும் செய்பவன்
அரசியல்வாதி
-
முருகன்
(கதம்பம்)
கல்லறைக்
கவிதை :
அரசியல்வாதி:
இவனது புகழ்பெற்ற
உண்ணாவிரதப் போராட்டம்
இங்குதான்
ஒழுங்காக நடக்கிறது.
தயவு செய்து
அரசியல் பேசாதீர்கள்
இவன்
எழுந்தாலும்
எழுந்து விடுவான்
- மு.மேத்தா (ஊர்வலம்)
இன்றும் நாளையும் :
கட்சித்
தலைவர்
வீட்டு
முன் நின்று
பள்ளியெழுச்சி
பாடிற்று
பட்டினி
பஜனை
அங்கே-
வரவேற்பு
நல்கிற்று
“நாய்கள்
ஜாக்கிரதை”
தேர்தல்
வந்தது
ஓட்டுக்
கேட்கத்
தலைவர்களும்
வந்தனர்
வாசல்கள்
தோறும்
வரவிருந்ததை
ஒட்டியது
“திருடர்கள்
ஜாக்கிரதை”
-
சுப.கதிரேசன்
(“நீ”)
அறிவுரை :
ரோம் பாரீஸ் லண்டன்
நியூயார்க் டோக்கியோ சிங்கப்பூர்
வழியாக இந்தியா வந்தவுடன்
தலைவர் பேசினார்.
‘டாக்டர்களே !
இஞ்சினீயர்களே !
இளைஞர்களே !
கிராமங்களுக்குச் செல்லுங்கள்
அங்குதான் இந்தியாவின்
ஆன்மா குடியிருக்கிறது’.
-
தாமோதரன்
(“நீ”)
அறிவுரைக்கு ஓர் அறிவுரை :
டாக்டர்களும், இஞ்சினீயர்களும்
பிற இளைஞர்களும் சொன்னார்கள்
தலைவர்களே !
ரோம் பாரீஸ் லண்டன்
நியூயார்க் டோக்கியோ செல்லுங்கள் !
இந்தியாவின் ஆன்மா
அமைதியாக வாழட்டும் !
-இராசேந்திரமோகன் ( “நீ” )
பிரச்சாரம் :
தேர்தல் மேகம்
சூழ்ந்தபோது
வாக்குச் சீட்டு மழைக்காக
அரசியல் தவளைகள்
போடுகின்ற
வறட்டுக் கூச்சல்
-வெள்ளை மலர்கள்
சட்டமன்றம் :
நாலரைக் கோடி
மலர்களின் சார்பாய்
செருப்பு வீச –
‘செந்தமில்’
வார்த்தைகள் அம்மணமாய்…
வேட்டியை அவிழ்த்து
குஸ்திகள் போட
ஒரு
மாநில விளையாட்டு மைதானம்
-புகழேந்தி (அக்கினிக் குஞ்சுகள்)
தேர்தல் :
முதலில்
அட்சய பாத்திரம்
என்றுதான்
எண்ணியிருந்தோம்…
பிறகுதான் தெரிந்தது
வெறும்
பிச்சைப் பாத்திரம் தான்
என்று.
-புகழேந்தி (அக்கினிக் குஞ்சுகள்)
எம்.எல்.ஏ:
பிறர் மனைச் சரித்திரத்தை
வாய் கிழிய
ஏர் கண்டிஷனில்
இருந்து கொண்டு
நரகல் நடையில்
அர்ச்சனை செய்திட
நாம்
தேர்ந்து அனுப்பிய
பூசாரி..
-புகழேந்தி (அக்கினிக் குஞ்சுகள்)
கருத்துகள் இல்லை:
கருத்துரையிடுக